21/02/2012

"Rəvan"la matçın çətin keçəcəyini bilirdim. Oyun ərzində kifayət qədər qol imkanlarımız olsa da, bunların yalnız birindən yararlandıq.

Qol.Az-ın məlumatına görə, bu sözləri "Neftçi" klubunun baş məşqçisi Böyükağa Hacıyev "Rəvan"la oyundan (1:0) sonra keçirilən mətbuat konfransında deyib.

Hacıyev bu görüşdə Flavinyonun qolu sayəsində vacib 3 xal qazandıqlarını bildirib: "Rəvan" yaxşı müdafiə olundu. Əsasən də qapıçıları inamlı təsir bağışlayırdı. Flavinyo qələbə qolunu vurmaqla komandaya vacib 3 xal qazandırdı. Denis Silvanı əvəzləməyimə gəldikdə isə deyəsən onu bir qədər ərköyünləşdiriblər.

Mən komandaya gələndən sonra hər kəsə öz yerini göstərdim. Əgər Denis oynamaq istəmirsə, o zaman gəlib ehtiyat skamyasında otursun. Bu səbəbdən Silvanın əvəzinə meydana Cavid İmamverdiyevi buraxdım. "Neftçi"də əvəzolunmaz futbolçu yoxdur".