12/01/2010

Peşəkar Futbol Liqasının prezidenti Ramin Musayevin www.pfl.az saytına müsahibəsi.

- Bildiyimiz kimi, bir neçə gün öncə Birləşmiş Ərəb Əmirliklərinə səfər etmisiniz. Səfərlə bağlı təəssüratlarınız necədir?

- Dekabr ayının 28-dən yanvar ayının 5-nə kimi Birləşmiş Ərəb Əmirliklərinin Dubay şəhərində oldum. Dubay mənə çox gözəl təsir bağışladı. Müasir binaları, xoş münasibətli insanları var. Dünyanın ən hündür binası olan Bürc Xəlifə (keçmiş Bürc Dubay) isə ayrıca zövq və gözəllik simvoludur.  

- BƏƏ-yə səfəriniz nə ilə bağlı idi?

- Səfərim şəxsi məqsəd daşısa da, fürsətdən istifadə edib BƏƏ futbolu və futbol ictimaiyyəti ilə yaxından maraqlanmışam. BƏƏ Peşəkar Futbol Liqasının Prezidenti Doktor Tariq Humaid Əl Tayer və BƏƏ Peşəkar Futbol Liqasının İdarə Heyətinin üzvü və Texniki Komitənin sədri Abdullah Əl Cunabi ilə görüşlərim oldu. BƏƏ Peşəkar Futbol Liqası da Azərbaycan Peşəkar Futbol Liqası kimi yeni qurulub. Görüşümüzdə bu iki gənc liqanın qarşılıqlı əməkdaşlığı və münasibətlərinin inkişaf etdirilməsi məsələlərinə toxunduq. Həm bizim üçün, həm də BƏƏ-li həmkarlarımız üçün maraqlı və faydalı görüş oldu. Azərbaycan Peşəkar Futbol Liqası, Unibank Premyer Liqası, ümumiyyətlə ölkəmizin idman həyatı  BƏƏ-li idarəçilərin marağına səbəb oldu. Təkcə futbolda deyil, həmçinin idmanın digər növlərində - güləş, cüdo və digər olimpiya idman növlərində qazandığımız uğurlarla maraqlandıqlarını və son zamanlar ölkə prezidenti cənab İlham Əliyevin göstərdiyi xüsusi diqqət və qayğı nəticəsində yüksək templərlə inkişaf edən idmanımızla daha yaxından tanış olmaları üçün ölkəmizə gələcəklərini bildirdilər. Mən də, öz növbəmdə, Respublikamızın sosial və iqtisadi həyatının yüksək sürətlə inkişaf etdiyini nəzərə alaraq, Bakı şəhərinin yaxın zamanlarda Dubay kimi inkişaf etmiş şəhərlə rəqabət aparacaq səviyyədə olacağını vurğuladım.

- Səfər zamanı diqqətinizi çəkən nə kimi məqamlar oldu?

- Qeyd edim ki, BƏƏ Peşəkar Futbol Liqasında bizi maraqlandıran bəzi cəhətlər oldu. Misal üçün, Liqaya sponsor cəlbi, marketinq və yayım hüququ diqqətimizi çəkdi. Cəmi 2 il fəaliyyət göstərməsinə baxmayaraq, Liqanın illik gəliri bir neçə milyon dollardır. BƏƏ Peşəkar Futbol Liqasında 6 FİFA hakimi fəaliyyət göstərir. Liqanın televiziyada yayımı çox yüksək səviyyədə həyata keçirilir. Oyunlar minimum 12 kamera ilə lentə alınır. Digər bir maraqlı məqam isə bütün oyunların təhlükəsizliyinin klublar tərəfindən yox, Peşəkar Futbol Liqası tərəfindən təmin olunmasıdır. Oyunlar zamanı bütün stadionlara Peşəkar Futbol Liqası nəzdində fəaliyyət göstərən təhlükəsizlik işçiləri ezam olunur.

- Dubayda yaşayan həmvətənlərimizlə görüşə bildinizmi?

- Dubayda olduğum zaman hörmətli həmvətənimiz, uzun müddət Azərbaycan futboluna əmək vermiş Faiq Hüseynovun mütəxəssis kimi fəaliyyət göstərdiyi Dubayın “Əl Əhli” klubunda oldum. “Etisalat”ın (BƏƏ-nin ən böyük mobil telefon operator şirkətidir) sponsoru olduğu Etisalat Kubokunun “Əl Əhli” və “Şarja” klubları arasında keçirilən oyuna dəvət edilmişdim. Qeyd edim ki, “Əl Əhli” klubunun prezidenti Dubay Əmiri Şeyx Məhəmməd bin Rəşit Əl Maktumun oğlu Şeyx Hamdandır və klub 2008-2009-cu illər mövsümündə BƏƏ Liqasının çempionu və Kubokun qalibi olmuşdur. 2009-cu ilin dekabr ayında BƏƏ-nin paytaxtı Abu Dabidə keçirilən FİFA Klublararası Dünya Kubokunda iştirak etmişdir. Klubun çox gözəl stadionu, texniki infrastrukturu, təcrübəli tibbi heyəti var. Çox sevindirici faktdır ki, həmvətənimiz Faiq Hüseynovun öz klubunda böyük hörməti var, istər klub idarəçiləri, istər texniki heyət, istər oyunçular ona çox böyük rəğbət bəsləyirlər və keçən il əldə olunan uğurlarda Faiq müəllimin xüsusi rolunu vurğulayırlar. Fürsətdən istifadə edib, mən də Faiq Hüseynova və onun ailəsinə göstərdikləri diqqət və qayğı üçün çox təşəkkür edirəm, ürəyi Azərbaycan və Azərbaycan futbolu üçün döyünən bu insana işlərində və həyatında müvəfəqiyyətlər arzu edirəm.

PFL.AZ