İyunun 30-da Avro Liqanın birinci təsnifat mərhələsində hər iki təmsilçimiz – “Qarabağ” və AZAL ilk oyunlarına çıxacaq.

AZAL rəqibi Belarus “Minsk”ini Şüvəlandakı yeni arenasında qəbul edəcək. Saat 20:00-da başlayacaq oyun “İdman Azərbaycan” telekanalı vasitəsiylə canlı yayımlanacaq.

Həmin gün “Qarabağ” Litvada, yerli “Banqa”nın qonağı olacaq. Bakı vaxtı ilə saat 20:30-da ağdamlılar meydana çıxacaq. “Banqa”nın ev oyunlarını keçirdiyi Qarjdai şəhər stadionundakı qarşılaşma da AzTV-dən canlı yayımlanacaq.

“Xəzər-Lənkəran” Avstriyada Avro Liqaya hazırlaşır. Amma lənkəranlılar hazırlıqlarını hələ də tam heyətlə keçə bilmir. Komandanın əsas heyət üzvlərindən olan yarımmüdafiəçi Julius Vobay və hücumçu Emeka Oparanın viza problemi üzündən toplanışdan kənarda qalıb. Artıq xeyli müddət ötməsinə rəğmən, məsələ həllini tapmaq bilmir. Bu üzdən qaradərili legionerlər hazırda Azərbaycandadı. Fiziki formalarını tam itirməmələri üçün “Xəzər”in məşqçilərindən Samir Ələkbərov onlara fərdi məşqlər keçir.

Klub rəhbərliyi viza məsələsini həll edib, onları tezliklə Avstriya toplanışına yollamağa çalışır.

"Muğan"ın yeni baş məşqçisinin adı bəlli olub. Komandanı yeni mövsümdə də yerli məşqçi çalışdıracaq. Bəhmən Həsənovun "Rəvan"a keçidindən sonra başsız qalan Salyan təmsilçisinə Füzuli Musayev rəhbərlik edəcək. Artıq onunla müqavilə də bağlanıb.

Maraqlıdı ki, Musayev bundan əvvəl məhz "Rəvan"da məşqçi işləyirdi.

“Neftçi”nin Çempionlar Liqasındakı rəqibi "Dinamo"nun baş məşqçisi Krunoslav Yurciç Avstriyaya gedəcək. Məqsəd adıçəkilən ölkədə təlim-məşq toplanışında olacaq bakılıların yoxlama oyunlarından birini canlı izləməkdi.

Bu barədə Yurciç özü məlumat verib: "Rəqibimiz Avstriyaya yollanacaq. Mən də ora gedəcəm. Onların hansı mövqedə daha təhlükəli olduqlarını ilə yerindəcə tanış olmaq istəyirəm".

Zaqreblilərin düşərgəsindən daha bir xəbər var: komandanın aparıcı üzvü Sammir son məşqlərin birində zədələnib. Braziliyalı yarımmüdafiəçinin çempionumuza qarşı oynayıb-oynamayacağı bəlli deyil. "Dinamo" bundan əvvəl Çili millisinin  üzvü Pedro Moralesi eyni səbəbdən itirmişdi.

“Qarabağ” hər il yay hazırlığı üçün Türkiyəyə, həm də eyni məkana yollanır. Ankaradan 80 km aralıda yerləşən, füsunkar Qızılcahamam bölgəsində, dağlar qoynunda yerləşən 5 ulduzlu `Patalya` otelində düşərgə salır.

“Qarabağ”ın xatirəsi artıq Qızılcahamamda əbədiləşdirilib. `Patalya` otelinin rəhbəri Okan Akçanın təşəbbüsü ilə Ağdam Futbol Klubunun şəninə xatirə parkı salınıb. Ərazidə boş yer ayrılıb və komanda üzləri hər gün bir ağac əkib. Fidanlar əkildikdən  sonra bütün “Qarabağ”lılar xatirə şəkili çəkdiriblər.

1. “Kəpəz”i 35 yaşlı kapitanı Azər Məmmədov maraqlı müsahibə verib.

- Azər, yola saldığımız mövsümü "Gəncə" üçün necə dəyərləndirirsən?
- Nəzərə alsaq ki, premier liqaya qayıdana kimi 3 il Gəncədə
futbol olmamışdı, onda 9-cu yeri qənaətbəxş nəticə saymaq olar. Şəhərimizdə futbolun olmadığı dövrdə bu idman növü inkişafdan qalmışdı. İndi də komandada yerli oyunçular azlıq təşkil edir. Futbolsuzluqla bağlı nəticəyə pis demək olmaz. Ancaq ümumilikdə 9-cu yer Gəncə futbolunun tarixinə yaraşmır.
- Çıxış etdiyin komandalar, adətən, çempionatda üst pillələrdə yer alıb. Bu mənada özün üçün mövsümü necə qiymətləndirirsən?
- Açığı, öz oyunumdan tam razı deyildim. 9-cu yeri tutan futbolçu özündən razı ola bilməz. Tutduğumuz mövqe imkan vermir ki, kimsə özünü tərifləsin. O düzdü ki, formasını geydiyim komandalar həmişə iddialılar sırasında olub. Açığı, artıq bununla barışıram. Çünki yaşım da az deyil və hər bir güclü futbolçunun başına belə şey gələ bilər.
- Mövsüm ərzində iki məşqçi ilə işlədiz. Fuad İsmayılovun dönəmində 1 hücumçu ilə oynadığınıza görə müdafiənin üzərinə daha böyük iş düşdü. Mehman Allahverdiyev isə hücumameyilli futbola üstünlük verdiyindən arxa xətdə bir qədər rahatladız. Məşqçilərin işini necə qiymətləndirirsən?
- Əvvəlcə onu deyim ki, hər iki mütəxəssisin Gəncə futbolunda böyük əməyi olub. Komandaya uğur qazandırıblar. Futbola baxışları da fərqlidi. Bizi öz sistemlərinə uyğun oynadırdılar. Ona görə də deyə bilmərəm, hansı pis, hansı yaxşı idi. Çünki komanda ikinci "altılıq"da mübarizə aparırsa, sistem dəyişikliyinin ciddi təsiri olmur. Qarşıdakı mövsüm yəqin dəyişikliklər hiss olunacaq.
- Fuad İsmayılovun istefaya göndərilməsində sənin də rolun oldu. "Simruq"la oyunda öz qapınıza vurduğun qol məğlubiyyətlə nəticələndi və...
- Rolum oldu (gülür). Bunda bir az özümü günahkar sayıram. Ancaq Fuad müəllimin istefaya göndərilməsinin əsas səbəbkarı mən deyiləm. Bu futboldu. Həmin oyunun 1-ci hissəsindən sonra paltardəyişmə otağında gözümdən yaş gəldi. Bunu sizə etiraf edirəm. Uşaqlardan xahiş etdim ki, bu oyunu mənə görə oynayın. Amma qismət olmadı. Qarşılaşmadan sonra da eşitdim ki, İsmayılovu istefaya göndəriblər. Nəinki futbolda, digər sahələrdə də iş yeri daimi deyil. Ola bilərdi ki, həmin qola görə məni də komandadan çıxara bilərdilər. Bu, karyeramda öz qapımıza vurduğum ilk qol idi. Ancaq minlərlə qol ola biləcək top çıxarmışam. Nə edək, hərdən belə də olur.
- Səni 10 ildən çox tanıyan biri kimi nə futbolda, nə də ondan kənarda münaqişəyə girən görməmişəm. Ancaq həmin oyunda avtoqola görə az qala azarkeşlərlə dalaşacaqdın.
- Onda çox əsəbi idim. Ancaq elə fikirləşirəm ki, fanatlarla münaqişəyə girməkdə düz etmədim. İki cavan oğlan idi. Fasilə ərəfəsində mənə söz atdılar ki, 2-ci hissəyə çıxanda qapımıza bir qol da vurarsan. Həmin sözlər mənə pis təsir etdi. Onsuz da çox üzülmüşdüm, azarkeşlərin də belə deməsi məni lap pərişan etdi. Əsəbi idim və düzgün addım atmadım. Onlara tərəf getməməliydim. Çünki onlar azarkeşdi, hər şey deyə bilərlər. Başqa vaxt məni dəfələrlə alqışlayıblar.
- Yaşının elə dövrüdü ki, futbolda qocalmağa doğru gedirsən. Tovuzda özüm şahidi olmuşam: istər məşqdə, istərsə də oyun vaxtı cavan uşaqlar Eltay əmi, Nizami dayı deyib təcrübəli komanda yoldaşlarına müraciət edib. Sənə necə, əmidən-dayıdan deyən olub?
- Bildiyiniz kimi, "Qarabağ"da da oynamışam. Onda Əfran İsmayılov, Maksim Medvedev hələ çox gənc idi. Rasim Karanın dövrü idi. Onlar həmişə mənə Azər abi deyirdilər. Mənə əmi də, Azər də desələr, qəbul edərəm. Bunun elə bir əhəmiyyəti yoxdu. Əsas odu ki, Gəncədə yaxşı futbolçular yetişsin. İndi şəhərdə gənc oyunçu azdı. Bilirsiz ki, Nizami Yurdunda yaxşı futbolçu yetişsə, bu, ölkə futbolu üçün xeyirli olacaq. Çünki Gəncə futbol məktəbidi. Bu istiqəmətdə işlər gedir. Gəncə Regional Futbol Federasiyası və "Kəpəz" klubu bu yöndə iş apırır. Gözlənilir ki, bundan sonra yaxşı olacaq.
- Yadımdadı 90-cı illərin sonunda Tofiq Məmmədov futbolla vidalaşanda hamı deyirdi ki, "təəssüflənməyə dəyməz, artıq Azər Məmmədovumuz var". Bu gün necə, Azərin layiqli davamçısı yetişirmi?
- Tofiq Məmmədov futboldan gedəndə formasını mənə verdi. Hamı ondan sonra mənə ümid bağlayırdı. Bilirsiz, həmin dövrdə mahmudlar, faiqlər, xaliqlər vardı. Açığı, hazırda elə futbolçular yetişmir. Ancaq gələcəkdə olacaq. Əvəzedici heyətdə 4-5 yaxşı uşaq var. Hiss olunur ki, yüksək səviyyədə çıxış edə biləcəklər. Ancaq 4-5 uşaq Gəncə üçün azdı.
- Karyeranın bundan sonrakı dövrü necə olacaq? Təklif var?
- Açığı, oynamaq istəyirəm. Gücüm də var. Yəni futbolu atmaq fikrim yoxdu. "Kəpəz"lə bağlı söhbət var. Fikrim bu komandada oynamaqdı. İnşallah, yəqin ki, doğma klubumda çıxış edərəm.
- "Kəpəz" Avroliqaya vəsiqə qazanmaq üçün oynamaq istəyir. Ancaq bu elə də asan olmaycaq. Çünki iddialı 6-7 klub var.
- Sizinlə tam razıyam. Düşünürəm ki, transferlərdən çox şey asılı olacaq. Yaxşı futbolçular gətirilsə, yuxarı pillələr uğrunda oynamaq olar. Niyə də oynamayaq?!
- Ötən əsrin 90-cı illərinin sonları Gəncə futbolunun qızıl dövrü sayılır. Bir qədər öncə həmin dövrün bir neçə aparıcı futbolçusunun adını çəkdin. Gəncə futbolunda yenə elə bir dövr olacaqmı?
- Açığı, hazırda belə olacağını görmürəm. Mən Məhəmməd Məmmədovun yetirməsi olmuşam. O vaxtı onun 4 qrupu vardı. Futbol olmayan dövrdə hər müəllimdə 1 bölmə qalmışdı. İndi yenə qruplar çoxalıb. Hiss olunur ki, Gəncədə futbol inkişafa doğru gedir. Bir az səbr etsək, 5-6 il sonra yenə şəhər futbolunun qızıl dövrü gələ bilər. Gəncə yenidən Azərbaycan futbolunda hegemonluğu ələ keçirə bilər.
- Gəncədə futbolun inkişaf etdiyini deyirik. Amma bu gün şəhərin ən yaxşı yeniyetmələri "Qəbələ"nin Futbol Akademiyasında çıxış edir. Elə sənin qardaşın oğlu da Qəbələdədi. Sözsüz ki, onlar sabah Azərbacyan futboluna xeyir verəcəklər. Amma Gəncə futbolunun yetirməsi kimi yox.
- Düzdü. Ümumiyyətlə, futbolda şərait harda yaxşıdı, hamı ora qaçır. Valideynlər də bilir ki, Qəbələdə futbol üçün hər cür şərait var. Ona görə də hamı uşağını ora aparır. Amma Gəncədə belə akademiya olsa, bütün Azərbaycandan uşaqlar bura gələcək. Gəncədə futbolun ənənəsi, tarixi var. Burda daha tez və yaxşı futbolçu yetişdirmək olar. Amma şərait olan yerdə. Əsgər Abdullayev Tovuz futbolu haqda danışarkən deyib ki, rayonda uşaqlar sanki bulaq kimi qaynayır. Gəncədə də belədi. Burda Qəbələdəki şərait olsa, hamı geri qayıdacaq. Eşitdiyimə görə, şəhərimizdə də belə bazalar yaradılacaq. (“Futbol+”)

İlk sınaq

Avstriyanın Fulpmes şəhərciyində hazırlığını davam etdirən “Xəzər-Lənkəran” 2-ci Bundesliqa təmsilçisi “Dinamo” (Drezden ) ilə ilk yoxlama oyununa çıxıb. Neustift şəhərciyində yerləşən meydanda keçirilən oyuna “ Xəzər Lənkəran” aşağıdakı start heyətlə rəqibi qarşısına çıxıb: Kamal Bayramov, Elnur Allahverdiyev (k), Manuel Skarlatake, Elvin Beqiri, Rahid Əmirquliyev, Elnur Abdullayev, Katalin Doman, Dieqo Souza, Andrey Mureşan, Onofranş, Joao Pinto.

Oyun qolsuz başa çatıb. İkinci hissədə Şəhriyar Xəlilov, Orxan Sadıqlı, Alim Qurbanov və Tosin Dosunmu meydana çıxıb.

İki transfer rəsmiləşdi

Lənkəranlılar artıq iki transferi rəsmiləşdirib. Nigeriya millsinin üzvü Tosin Dosunmu ilə rumıniyalı Marius Onofraşla Avstriyanın Fulpmes şəhərində müqavilə imzalanıb. Tərəflərin anlaşması bir illikdi.

Tezliklə portuqaliyalı Joao Pintoyala da sözləşmə imzalanmalıdı.

İdman direktoru qovuldu

“Xəzər-Lənkəran” klubunun müqaviləsini pozduğu şəxslərdə var. Komandanın idman direktoru vəzifəsində çalışan Fabian Veldviyklə yolları ayırmağa qərar verilib. Qışda Azərbaycana gətirilən mütəxəssisin fəaliyyəti uzunömürlü olmayıb. İdman direktoru kimi bütün aşağı yaş qruplarına başçılıq edən hollandın işi mövsümün sonunda klub rəhbərliyi tərəfindən analiz olunub və onunla iş birliyini yekunlaşdırmaq məqsədəuyğun hesab edilib.

“İnter”in Türkiyənin İsparta şəhərindəki toplanışında 20 futbolçu iştirak edir.

Heyət bu şəkildədi:

qapıçılar: Georgi Lomaya, Dmitri Kramarenko, Səlahət Ağayev, Anar Məhərrəmov.

müdafiəçilər: İliya Kandelaki, Valeri Abramidze, Xəyal Mustafayev, Ruslan Poladov, Arif Daşdəmirov.

yarımmüdafiəçilər: Petar Zlatinov, Daniel Genov, Bronislav Çervenka, Samir Zərgərov, Asif Məmmədov, Asif Mirili, Şəhtiyar Rəhimov, Nizami Hacıyev.

hücumçular: Girts Karlsons, Baçana Tsxadadze, Elnur Abdulov.

Toplanışın gedişində heyətə Vladimir Levin və hazırda U-19 millisinin sıralarında olan Aleksandr Qrossun də qatılacaqları gözlənilir. Bu   futbolçular Türkiyəyə iyunun 28-i gələcək. Xatırladaq ki, millimizin də şərəfini qoruyan Levinin klubla yeni müqavilə şərtlərində razılaşa bilmədiyi və “Bakı”ya keçəcəyi söylənilirdi.

İtaliyanın «İnter» klubunun prezidenti Massimo Moratti Bakıda işgüzar səfərdədi. O, əvvəlcə AFFA və ARDNŞ (SOCAR) prezidenti Rövnəq Abdullayevin, sonrr isə

dövlət başçısı İlham Əliyevin qəbulunda olub. Xatırladaq ki, dünya şöhrətli italyan klubunun sahibi neft maqnatıdı. O, “Saras S.p.A” korporasiyasının sədridi.

Abdullayev, Morattini və onu müşayiət edən şəxsləri ARDNŞ-nin Baş ofisində qəbul edib. Qarşılıqlı olaraq xatirə hədiyyələri təqdim edilib. Morattini qiyabi olaraq çoxdan tanıdığını söyləyən AFFA başqanı onunla şəxsən tanış olmaqdan məmnunluq duyduğunu bildirib: “Bizim hər ikimizi həm neft işi, həm də futbol bağlayır. Azərbaycana xoş gəlmisiniz!”

O, “Saras”la SOCAR arasında əməkdaşlığın genişləndirilməsi üçün yeni imkanlar açıldığını qeyd edərək, bu əməkdaşlığın qarşıdakı illərdə daha da dərinləşəcəyinə əminliyini bildirib.

Moratti Azərbaycanda ilk dəfə olduğunu və Bakı ilə tanışlığın onda böyük təəssürat doğurduğunu deyərək paytaxtımızın arxitekturasında qədimlik və müasirlik elementlərinin sıx qovuşduğunu xüsusi qeyd edib: “Bu iki cəhət Bakını fantastik dərəcədə gözəlləşdirir. Mən bundan sonra da Bakını və buradakı dostlarımı görməyə tez-tez gələcəyəm”.

Atası Ancelo Moratti tərəfindən yaradılmış “Saras” korporasiyasının sahiblərindən biri olduğunu söyləyən qonaq, bu şirkətin İtaliyada və digər ölkələrdə fəaliyyətindən geniş söz açıb. ARDNŞ-ni böyüyən və ilbəil inkişaf edən beynəlxalq səviyyəli bir şirkət kimi yaxşı tanıdıqlarını deyən qonaq əməkdaşlığın genişlənməsində maraqlı olduqlarını ifadə edib. Sonra tərəflər arasında neft işi və futbol ilə əlaqədar qarşılıqlı maraq doğuran məsələlərin geniş spektri ətrafında fikir mübadiləsi aparılıb.

Morattinin Azərbaycan ilə görüşündə isə ölkəmizdə idmanın inkişafı sahəsində görülən işlərdən danışılıb, beynəlxalq səviyyədə idmanla bağlı əldə etdiyimiz uğurlar qeyd edilib. Azərbaycanın beynəlxalq idman əlaqələrinin genişləndirilməsi işinə töhfə verdiyi vurğulanıb.

«İnter»in sahibi Bakını gəzməyə də vaxt tapıb. İçərişəhər Dövlət Tarix-Memarlıq Qoruğunu da ziyarət edib, tarixi abidələrlə tanış olub.

“Banqa” ilə Avro Liqa matçı oyunu öncəsi “Qarabağ” çətin vəziyyətə düşüb. Rauf Əliyevin gözləniləndən tez sağalacağı haqda müjdənin sevinci ötməmiş, daha bir aparıcı futbolçu zədələnib. Bu komandanın ötən mövsüm avrokuboklarda ən sərrast oyunçusu olan Əfran İsmayılovdu. Əfran məşqdlərdən birində zədələnib. Topuğunda ağrı hiss edən 22 yaşlı vinger dərhal Ankaraya həkim müayinəsinə aparılıb. Müayinədən sonra onun ən azı bir neçə gün məşq etməyəcəyi məlum olub.

Əvvəlcə İsmayılovun ayın 30-da Litvada keçiriləcək qarşılaşmanı buraxacağı və hətta təkrar matça çıxmamamaq ehtimalının olduğu söylənilsə də, bədbin proqnozlar özünü doğrultmayıb. Əfran, mütləq “Banqa”ya qarşı forma geymək istəyir: “Məşq zamanı qaçanda topuğumda müəyyən ağrılar hiss etdim. Ayağımı yerə basanda daha çox hiss olunurdu. Amma şükür Allaha ki, müayinə zamanı ciddi bir çey çıxmadı. 2 gün istirahət etməliyəm. İnşallah, sonra məşqə başlayacam. Belə baxanda “Banqa” ilə oyunda meydana çıxma ehtimalım yüksəkdi. Çox istəyirəm ki,  komandamın yanımda olum. İlk oyun çox vacibdi. İnşallah, “Banqa” ilə oyunda meydana çıxacam. Bunun üçün nə lazımdısa edəcəm”.